“Arrestimi i rrezikshëm” që zgjoi ironinë e Mal Berishës: Si u vu në pranga kampioni i Shqipërisë

Prej ditësh, tensionet dhe protestat e qytetarëve që kërkojnë largimin e qeverisë së kryeministrit Edi Rama kanë pushtuar rrugët e kryeqytetit. Kjo periudhë trazirash është shoqëruar gjithashtu me një valë shoqërimesh dhe ndalimesh nga ana e Policisë së Shtetit. Në lidhje me këto ngjarje, ka reaguar ashpër përmes një mesazhi ironik ish-ambasadori i Shqipërisë në Mbretërinë e Bashkuar dhe historiani i njohur, Mal Berisha. Ai ka sjellë në vëmendje rastin e një të riu të quajtur Roelti, i cili u trajtua nga autoritetet si një “kriminel”, pavarësisht se profili i tij është krejtësisht i kundërt. Duke ndjekur zhvillimet përmes ekranit të televizorit, Berisha ka komentuar me nota sarkazmi veprimin e forcave të rendit: “Nga ekrani i televizorit, syri më kapi një ‘kriminel’ të cilin policia e arrestoi dhe e ‘shpëtoi’ Shqipërinë nga një person kaq i ‘rrezikshëm’!” Sipas ish-diplomatit, i riu në fjalë, Roelti, është student në Universitetin e Arteve, në degën e dirigjimit, duke dëshmuar një formim të spikatur akademik dhe artistik. Kualifikimet e tij shtrihen përtej muzikës. Në moshën 11-vjeçare, ai u rendit në vendin e dytë në kompeticionin e njohur “MasterChef” për të rinjtë shqiptarë, ndërkohë që është edhe fitues i disa çmimeve ndërkombëtare në piano. Po ashtu, profili i tij plotësohet edhe nga suksesi në fushën e sportit, pasi ai është anëtar i ekipit të basketbollit GOGA, skuadër që mban titullin kampion i Shqipërisë. Në përmbyllje të reagimit të tij, duke ironizuar situatën dhe mënyrën se a po trajtohen të rinjtë nga strukturat e rendit, Mal Berisha shprehet me nota lutjeje: “Na ruaj, o Zot, nga ky ‘kriminel’!”