Gjykata Kushtetuese shënon 17-vjetorin me konferencë ndërkombëtare

Gjykata Kushtetuese e Kosovës do ta shënojë 17-vjetorin e themelimit me një konferencë ndërkombëtare kushtuar rolit të gjykatave kushtetuese në mbrojtjen e demokracisë dhe funksionimin demokratik të institucioneve. Konferenca do të mbahet të enjten, më 22 tetor, në Prishtinë, duke filluar nga ora 09:30. Para fillimit të punimeve, fjalë rasti do të mbajnë kryetari i Gjykatës Kushtetuese të Kosovës, Nexhmi Rexhepi, presidentja e Kosovës, Justina Shiroka-Pula, si dhe kryetari i Gjykatës Kushtetuese Federale të Gjermanisë, Stephan Harbarth, i cili do të jetë folësi kryesor i konferencës. Sipas njoftimit të Gjykatës Kushtetuese, në konferencë pritet të marrin pjesë përfaqësues të institucioneve të Kosovës, akademikë, përfaqësues të misioneve diplomatike dhe delegacione të nivelit të lartë nga gjykatat kushtetuese dhe supreme të disa vendeve evropiane. Në mesin e institucioneve pjesëmarrëse janë gjykatat kushtetuese të Gjermanisë, Austrisë, Sllovenisë, Letonisë, Lituanisë, Bullgarisë, Turqisë, Bosnjë e Hercegovinës dhe Maqedonisë së Veriut, si dhe Gjykata Supreme e Holandës dhe ajo e Estonisë. Në konferencë do të marrin pjesë edhe përfaqësues të Komisionit të Venecias dhe të Asociacionit të Gjykatave Kushtetuese Frankofone. Konferenca synon të vërë në fokus rolin e gjykatave kushtetuese në mbrojtjen e demokracisë dhe garantimin e funksionimit demokratik të institucioneve.