Muaji i Ndërgjegjësimit: Policia organizon marsh sensibilizues kundër kancerit të gjirit në Gjakovë, Malishevë e Rahovec

Në kuadër të fushatës dedikuar muajit të ndërgjegjësimit kundër kancerit të gjirit, Drejtoria Rajonale e Policisë në Gjakovë ka organizuar një marsh ndërgjegjësues, i cili u shtri në tri qendra: Gjakovë, Malishevë dhe Rahovec. Ky aktivitet u zhvillua përmes një bashkëpunimi të ngushtë me shërbimet shëndetësore të Policisë së Kosovës, institucionet vendore shëndetësore, organizata të ndryshme joqeveritare, si dhe anëtarë të Këshillave Lokale të Sigurisë Publike (KLSP). Qëllimi kryesor i këtij organizimi ishte inkurajimi i qytetarëve për kujdes më të madh ndaj shëndetit, kryerjen e kontrolleve të rregullta mjekësore dhe rëndësinë e diagnostikimit të hershëm, duke përcjellë gjithashtu një mesazh të fuqishëm solidariteti dhe mbështetjeje për të gjithë personat që po përballen me këtë sëmundje.