Krizë e re në tregun global: Çmimet e naftës kapërcejnë majat pesëmujore pas valës së re të sulmeve

Tregjet globale të energjisë kanë shënuar një tjetër alarm të kuq ditën e martë, teksa kuotat e karburanteve kanë prekur nivelin e tyre më të lartë brenda pesë muajve të fundit. Nafta e papërpunuar e llojit Brent ka kaluar kufirin e 110 dollarëve për fuçi, duke shënuar kështu tarifën më të kripur që prej datës 20 maj. Ky zhvillim ka rritur ndjeshëm ankthin te investitorët dhe aktorët e tregut ndërkombëtar, kryesisht si pasojë e intensifikimit të goditjeve nga rebelët Huthi ndaj objekteve energjetike të Arabisë Saudite, si dhe njoftimeve për incidente ushtarake ndaj anijeve tregtare në Gjirin Persik. Edhe pse Arabia Saudite, e cila mb mban vendin e eksportuesit kryesor në botë të naftës bruto, pati një rritje të prodhimit gjatë muajit të kaluar pavarësisht pengesave nga konfliktet, dëmtimet e vazhdueshme në infrastrukturën e saj përbëjnë një kërcënim serioz për vijueshmërinë e prodhimit dhe transportit përmes Detit të Kuq, i cili shërben si rrugë alternative kyçe për të anashkaluar Ngushticën e Hormuzit. Të dhënat e siguruara nga agjencia e monitorimit detar Kpler dëshmojnë se të paktën 18 mjete lundruese janë vënë në shënjestër të sulmeve vetëm gjatë dy javëve të shkuara. Gjatë këtij viti, nafta Brent ka regjistruar një ngjitje dramatike prej afërsisht 80%, e ndikuar drejtpërdrejt nga tensionet lidhur me Iranin dhe lufta e vazhdueshme mes Rusisë dhe Ukrainës, faktorë këta që kanë destabilizuar zinxhirin e furnizimit dhe kanë shtuar pasigurinë për ecurinë e ardhshme të karburanteve në shkallë globale. Nga ana tjetër, pavarësisht se eksportet e naftës kanë shfaqur shenja rikuperimi duke iu afruar kuotave të regjistruara para nisjes së konflikteve, dërgesat e derivateve të rafinuara vazhdojnë të mbeten të kufizuara. Megjithatë, ekspertët e fushës vlerësojnë se normalizimi i pjesshëm i dërgesave ende nuk ka arritur të eliminojë koston e lartë të rrezikut nga treguesit financiarë, ndërsa aktet e dhunës në vazhdim i detyrojnë tregtarët të qëndrojnë në gatishmëri të plotë për çdo zhvillim të mundshëm.