Formë e shkëlqyer për talentin kuqezi, Arman Durmishi shkëlqen me dy gola dhe i jep fitoren Juventusit U-23

Arman Durmishi vazhdon të jetë protagonist absolut dhe të konfirmojë formën e tij fantastike në futbollin italian, duke udhëhequr Juventusin U-23 drejt një triumfi të rëndësishëm me rezultatin 2:1 ndaj Renates në kampionatin e Serie C. Sulmuesi i Kombëtares së Shqipërisë hapi llogarinë e golave për skuadrën bardhezi në minutën e 23-të të takimit, ndërsa në minutën e 78-të realizoi golin e tij të dytë personal, i cili rezultoi edhe vendimtar për fatin e kësaj ndeshjeje. Këto tri pikë janë jetike për ekipin e të rinjve të Juventusit, të cilët arrijnë të shkëputen përkohësisht nga zona e rrezikut. Tashmë, ata pozicionohen në vendin e 15-të të renditjes me 10 pikë të grumbulluara në total. Për sulmuesin shqiptar, ky edicion futbollistik po ecën në shinat e duhura në rrafshin individual, ku ai ka arritur të regjistrojë deri më tani 3 gola të shënuar me fanellën e torinezëve.