Prapaskenat e bujshme: Pse Deco vendosi shitjen e Ferran Torres te PSG-ja

Largimi i bujshëm i Ferran Torresit nga radhët e Barcelonës gjatë merkatos së verës dëshmon se nuk bëhej fjalë thjesht për një llogari matematikore apo buxhetore të klubit katalanas. Sipas informacioneve të siguruara, kalimi i sulmuesit spanjoll te gjiganti francez Paris Saint-Germain për shifrën e rreth 50 milionë eurove erdhi si pasojë e drejtpërdrejtë e qëndrimit të drejtorit sportiv, Deco. Ky i fundit nuk e shikonte më futbollistin me origjinë nga Valencia si shtyllën kurrizore të repartit ofensiv për projektin afatgjatë të klubit. Torres i dha lamtumirën fanellës blaugrana më 15 gusht për të nisur një aventurë të re me kampionët e Francës. Realizimi i këtij transferimi i dha njëkohësisht mundësinë drejtuesve katalanas që të përparonin në bisedimet paralele me Manchester City-n për sigurimin e shërbimeve të Rodrit. Pavarësisht se spanjolli kishte rimarrë një peshë të madhe në skemat taktike të trajnerit Hansi Flick, Deco zgjodhi të mos e vendoste në prioritetet e tij zgjatjen e kontratës. Edhe pse menaxherëve të lojtarit iu la të kuptohej se diskutimet mund të startonin gjatë muajit shtator apo në vazhdim të vjeshtës, një propozim konkret nga zyrat e klubit nuk u materializua asnjëherë. Në këtë vendim thuhet se kanë peshuar edhe dinamikat e brendshme dhe lidhjet e kaluara mes Decos dhe ish-drejtorit sportiv, Mateu Alemany. Vetë Ferrani kishte qenë një bast personal i Alemanyt që nga koha e përbashkët te Valencia, duke ruajtur gjithashtu një miqësi të ngushtë me agjentin e sulmuesit, Héctor Peris. Në kushtet e një ngërçi të dukshëm për rinovimin dhe praninë e një interesimi të fortë nga jashtë kufijve spanjollë, vetë lojtarit iu desh të hapte dritën jeshile për kontaktet me parizienët, të cilat u mbyllën në një kohë mjaft të shkurtër. Kështu, sulmuesi mbylli kapitullin e tij në Camp Nou pas plot katër sezonesh e gjysmë, periudhë gjatë së cilës regjistroi 207 paraqitje, tundur rrjetën 65 herë dhe duke ngritur lart dy trofe të La Ligës, një Kupë të Mbretit si dhe tri Superkupa të Spanjës. Ironikisht, ky divorc u konsumua në kohën kur Torres po shijonte një nga momentet e tij më të mira, duke u shndërruar në pikë referimi si qendërsulmues nën urdhërin e Flick. Tani, fati e ka sjellë që ai të përballet sërish me ish-shokët e tij të skuadrës këtë të martë në stadiumin “Parc des Princes”, në sfidën e vlefshme për javën e tretë të fazës së grupeve në Ligën e Kampionëve.