Laporta paralajmëron deklarata të forta për Real Madridin: Do të flasim që nesër, ka shumë për të diskutuar

Kreu i klubit të Barcelonës, Joan Laporta, ka zbarkuar në Paris për të ndjekur nga afër një nga sfidat më madhore të sezonit, ku katalanasit do të masin forcat me Paris Saint-Germainin. Në prag të këtij superdueli evropian, Laporta mori pjesë në drekën zyrtare institucionale mes dy klubeve, ku u prit nga homologu i tij i PSG-së, Nasser Al-Khelaifi. Të dy krerët shkëmbyen përshëndetjet dhe realizuan foton tradicionale para një prej takimeve më joshëse të kësaj faze në arenën kontinentale. Gjatë vendosjes së tij në kryeqytetin francez, numri një i blaugranëve u vu përballë pyetjeve të gazetarëve lidhur me debatet e fundit rreth gjykimit në futbollin spanjoll, të nxitura pas ndeshjes mes Real Madridit dhe Sevillës. Megjithatë, drejtuesi i lartë katalanas zgjodhi të mos hyjë në detaje për këtë temë në atë moment, duke paralajmëruar një prononcim më të gjerë për ditët në vijim. “Për çështjen e Real Madridit do të kemi kohë të flasim nga nesër. Aty ka shumë për të diskutuar”, u shpreh shkurtimisht Laporta. Më pas, vëmendja e tij u zhvendos të kualifikimi dhe përballja ndaj parisienëve, duke bërë një analizë të formës dhe kapaciteteve të të dy ekipeve gjatë këtij edicioni. “Gjëja më e rëndësishme është ndeshja e radhës. Kjo është ndeshja më e mirë që mund të luhet në Evropë. Në këtë përballje, secila skuadër do të ketë mundësinë ta shohë nivelin e saj në raport me futbollin evropian. Jemi dy skuadrat që po luajmë futbollin më të mirë. Kemi lojtarë me shumë talent, që luajnë si grup dhe që drejtohen nga dy trajnerë të mëdhenj”, shtoi kreu i Barcelonës. Në vijim, Laporta iu përgjigj edhe pyetjeve rreth sfidave që i kanë dalë ekipit për shkak të mungesave të dëmtimeve, ku Eric Garcia dhe Jules Koundé do t'i mungojnë formacionit. Pavarësisht kësaj, ai shfaqi besim të plotë te zgjidhjet që tekniku Hansi Flick do të ofrojë. “Këto janë rrethana që ndodhin. Edhe ata nuk e kanë Nuno Mendesin. E di se Flick tashmë ka kërkuar zgjidhje për t’i zëvendësuar Ericun dhe Koundén. Kjo ndodh gjithmonë dhe nuk ka vend për arsyetime. Kemi një skuadër të mjaftueshme për t’i zëvendësuar”, përfundoi Laporta.