Bashkëpunimi Kuvend-NDI, Haxhiu dhe Soderberg fokusohen te agjenda legjislative dhe barazia gjinore

Kryetarja e Kuvendit të Kosovës, Albulena Haxhiu, ka zhvilluar një takim zyrtar me drejtoreshën e Institutit Kombëtar Demokratik (NDI), Nancy Soderberg. Gjatë këtij takimi, dy bashkëbisedueset u ndalën te prioritetet e agjendës legjislative, si dhe te mundësitë e mbështetjes për Institutin Parlamentar. Nëpërmjet një postimi në rrjetet sociale, Haxhiu bëri të ditur se biseda u shtri edhe te rëndësia e avancimit të politikave ligjvënëse që integrojnë në mënyrë të barabartë kërkesat dhe realitetin e të dy gjinive. Gjatë bisedës, ajo vuri theksin te domosdoshmëria e ngritjes së kapaciteteve profesionale brenda Kuvendit, duke siguruar që parimi i barazisë gjinore të jetë i pranishëm në çdo fazë të draftimit dhe shqyrtimit të nismave ligjore. “Besoj se ligjet e mira fillojnë nga njohja e mirë e nevojave të qytetarëve. Prandaj, është e rëndësishme që Kuvendi të ketë kapacitete të fuqishme profesionale dhe që barazia gjinore të jetë pjesë e vetë procesit të hartimit dhe shqyrtimit të ligjeve”, shkroi ndër të tjera ajo.