Nagavci: Ndryshimet ligjore për Specialen nuk garantojnë lirimin e ish-krerëve të UÇK-së

Shefja e Grupit Parlamentar të Lëvizjes Vetëvendosje, Arbërie Nagavci, ka deklaruar se amendamentet e miratuara për Ligjin për Dhomat e Specializuara nuk kanë fuqinë të anulojnë aktgjykimet dhe as të zëvendësojnë fazën e apelimit. Përmes një reagimi publik, ajo ka theksuar se Lëvizja Vetëvendosje kishte paralajmëruar që në fillim rreziqet, shpejtësinë e procedimit të këtij ligji, përmbajtjen e tij, si dhe pikëpyetjet e mundshme kushtetuese që mund të lindnin. Duke iu referuar zërave që po kërkojnë nga Presidentja kthimin e këtij ligji në Kuvend për rishqyrtim, Nagavci ka vlerësuar se kjo situatë vetëm sa rikonfirmon shqetësimet e ngritura nga subjekti i tyre politik ende pa u votuar ai. Ajo ka theksuar nevojën urgjente për një qasje të mirëfilltë strategjike shtetërore, përgatitje të lartë profesionale juridike për shkallën e dytë të gjykimit, si dhe një mobilizim më të fuqishëm diplomatik për të ruajtur dhe mbrojtur të vërtetën historike të luftës çlirimtare të Kosovës. “Ende pa kaluar dy javë nga miratimi i ndryshimeve në Ligjin për Dhomat e Specializuara, tashmë po dëgjohen kërkesa që Presidentja ta kthejë ligjin në Kuvend për rishqyrtim. Si Lëvizje VETËVENDOSJE!, që në fillim kemi ngritur shqetësimet tona për nxitimin me të cilin po procedohej ky ligj, për përmbajtjen e tij dhe për problemet e mundshme kushtetuese. Qëndrimi ynë ndaj Gjykatës Speciale ka qenë i qartë që nga viti 2015. Kemi kundërshtuar themelimin e saj dhe ky qëndrim nuk ka ndryshuar. Megjithatë, kemi theksuar se ndryshimet e propozuara ligjore nuk i shfuqizojnë aktgjykimet, nuk e zëvendësojnë procesin e apelit dhe nuk sigurojnë kthimin e ish-drejtuesve të UÇK-së në atdhe”, ka shkruar Nagavci.