Vëmendje te gjeneratat e reja: Kosova U16 nis sfidat në “Regional Challenge Cup” në hendboll

Përveç angazhimeve të Kombëtares A të Kosovës në konkurrencën e femrave, këtë javë skena i takon edhe talenteve të reja të Kombëtares U16 të vajzave, të cilat do të zhvillojnë ndeshje mjaft të rëndësishme. Federata e Hendbollit e Kosovës është tashmë pjesë e aktivitetit ndërkombëtar “U16 Regional Challenge Cup”. Kjo ngjarje rajonale, e cila synon avancimin dhe edukimin e duhur sportiv të brezave të rinj për dy gjinitë, përfshin ekipet kombëtare U16 nga 12 shtete të rajonit. Në konkurrencën e vajzave, Përfaqësuesja e Kosovës është pozicionuar në Grupin C, ku do të ketë përballë Rumaninë dhe Bullgarinë. Kalendari parashikon që ndeshjet të zhvillohen në sistem vajtje-ardhje në të trija vendet (nga dy ndeshje në Kosovë, Bullgari dhe Rumani), për t'i hapur rrugë më pas takimeve përfundimtare për plasman. Sfida hapëse e këtij kompeticioni do të luhet të enjten, duke filluar nga ora 19:30, në Pallatin e Rinisë dhe Sporteve në Prishtinë, ku Kosova do të matë forcat me Bullgarinë. Programi do të vazhdojë të premten prej orës 13:00 me duelin mes Rumanisë dhe Bullgarisë, ndërsa të shtunën, duke nisur nga ora 10:00, Rumania do të përballet me Kosovën. Turneu i dytë i grupit do të mbahet nga 27 deri më 29 nëntor në Bullgari, kurse faza e tretë dhe e fundit e këtij grupi është caktuar të zhvillohet nga 4 deri më 6 dhjetor në Rumani. Organizatorët kanë konfirmuar se aktiviteti “U16 Regional Challenge Cup” do të shtrihet gjithashtu edhe në konkurrencën e hendbollistëve të rinj (djemtë). Në kuadër përgatitor për këto sfida të para rajonale, vashat e Kosovës U16 janë tubuar zyrtarisht të martën në kryeqytet, ku kanë nisur stërvitjet nën urdhrat e stafit teknik.