Goditje për Kosovën, FFK konfirmon mungesën e Albian Hajdarit ndaj Austrisë

Federata e Futbollit e Kosovës ka zyrtarizuar mungesën e rëndësishme të mbrojtësit Albian Hajdari, i cili nuk do të mund të paraqitet në ndeshjen e sotme kundër Austrisë. Futbollisti kishte pësuar një lëndim gjatë duelit të fundit që “Dardanët” e zhvilluan kundër Irlandës. Pavarësisht angazhimit maksimal dhe trajtimit intensiv nga stafi mjekësor gjatë ditëve të fundit për ta rikthyer në fushë, koha e pamjaftueshme bëri që ai të mos arrijë të rikuperohet në kohë për këtë përballje që do të luhet në Vjenë. Sipas njoftimit zyrtar të shtëpisë së futbollit kosovar, vetë lojtari ka shprehur vullnet të palëkundur për të dhënë kontributin e tij në këtë takim vendimtar, mirëpo pas kontrollit përfundimtar mjekësor është vendosur mosaktivizimi i tij për shkak të rrezikut të dëmtimit të mëtejshëm. Për t'u siguruar që rikuperimi të shkojë sipas planit, Hajdari do të mbetet nën mbikëqyrjen e vazhdueshme të mjekëve të Përfaqësueses. Pas kësaj mungese në vijën e prapavijës, shtabi teknik pritet të bëjë lëvizje në formacionin startues. Mësohet se Ron Raçi do të zërë vendin e lënë bosh në zemër të mbrojtjes, duke formuar kështu treshen defensive krahas Lumbardh Dellovës dhe Ilir Krasniqit.