Atentati me tritol ndaj kryetarit të Njësisë Shushicë, zbulohen porositësit nga Tirana dhe prangosen dy persona

Strukturat e Drejtorisë Vendore të Policisë Vlorë kanë finalizuar një operacion për zbardhjen e ngjarjes së ndodhur të hënën, ku iu vendos lëndë eksplozive automjetit të kryetarit të Njësisë Administrative Shushicë, Igli Bimaj. Në kuadër të këtij aksioni, autoritetet blu kanë shoqëruar katër persona për t'i marrë në pyetje, nga të cilët dy janë arrestuar zyrtarisht. Të dyshuarit, të cilët tashmë ndodhen në qeli, rezultojnë të jenë me banim në Tiranë.

Gjatë kontrolleve dhe veprimeve të shpejta hetimore, grupi i posaçëm ka sekuestruar edhe një mjet dyshues, i cili pritet t'i nënshtrohet ekspertizës për të siguruar prova të reja materiale që çojnë drejt zbardhjes së plotë të dinamikës. Burime pranë grupit hetimor konfirmojnë se autorët e dyshuar kishin udhëtuar nga kryeqyteti drejt qytetit bregdetar për të kryer aktin. Ndërkohë, hetimet vijojnë intensivisht për të dokumentuar përfshirjen e secilit prej të ndaluarve dhe për të identifikuar persona të tjerë të mundshëm të përfshirë në këtë ngjarje kriminale.