Nevojat urgjente të tregut: Maqedoni e Veriut synon 20 mijë punëtorë të huaj për vitin e ardhshëm

Zëvendëskryeministri dhe ministri i Transportit dhe Lidhjeve, Aleksandar Nikolloski, ka deklaruar gjatë ditës së djeshme se shteti po ballafaqohet me sfida serioze në sigurimin e fuqisë punëtore të mjaftueshme. Ai e cilësoj si një hap të drejtë dhe strategjik vendimin e ekzekutivit për të ngritur kuotën vjetore nga 10 në 13 mijë punëtorë të huaj. Sipas vlerësimeve të zyrtarit të lartë qeveritar, ky tregues duhet të pësojë rritje të ndjeshme gjatë periudhës vijuese, për t'iu përgjigjur kërkesave të ekonomisë. "Nëse kërkoni qëndrimin tim personal, konsideroj se gjatë vitit të ardhshëm shifra duhet të ngjitet në 20 mijë, kurse deri në vitin 2030 duhet të kapërcejmë pragun e 50 mijë punonjësve të huaj në baza vjetore që do të angazhohen në Maqedoni, nëse dëshirojmë të mbajmë këtë ritëm të zhvillimit të Prodhimit Brendshëm Bruto", u shpreh Nikolloski mbrëmë gjatë një paraqitje televizive në emisionin "360 gradë". Ai bëri të ditur gjithashtu se pas zgjerimit të kuotave, kompania "Bechtel dhe Enka" nuk përballet më me mungesë krahu pune, ndërkohë që më parë i mungonin 670 punëtorë. Kabineti qeveritar ka caktuar një plafon prej 10.000 lejeve të punës për shtetasit e huaj përgjatë vitit 2026, dokument ky që do të nisë zbatimin më 16 janar. Nga ky total, 9.750 leje dedikohen për marrëdhënie të rregullta pune, 200 për persona të deleguar, kurse 50 janë parashikuar për nevoja sezonale. Brenda kategorisë së punësimit të rregullt, 4.500 leje i ndahen aplikantëve të rinj, ndërsa 5.250 janë rezervuar për rinovimin e lejeve ekzistuese. Statistikat tregojnë se numri i përgjithshëm i punonjësve të huaj të pajisur me leje qëndrimi, i cili arriti në 6.128 për vitin 2025, shënon një rritje prej tre herë e gjysmë krahasuar me pesë vite më parë, kur ky autorizim iu dha vetëm 1.704 individëve. Sektorët që shfaqin kërkesën më të lartë për këtë profil punëtorësh mbeten ndërtimtaria, sektori industrial, hoteleria dhe tregtia. Ndërkohë, vala më e madhe e fuqisë punëtore të huaj vjen nga vende si Bangladeshi, Nepali, India, Turqia, Kina dhe Filipinet.