Klasikja e Shqipërisë në 'Loro Boriçi': Vllaznia dhe Tirana vijnë me ecuri krejtësisht të ndryshme

Futbolli vendor do të dhurojë këtë fundjavë supersfidën e radhës, teksa të shtunën, duke filluar nga ora 18:30, stadiumi 'Loro Boriçi' do të jetë nikoqir i 'Klasikes së Shqipërisë' për këtë edicion. Ndonëse bëhet fjalë për dy prej skuadrave me historinë më të pasur dhe ndër klubet më të vjetra në elitën e futbollit shqiptar, kualifikueset e këtij sezoni i kanë gjetur të dyja kampet në pole të kundërta për sa i përket ecurisë së tyre. Megjithëse rivaliteti mbetet gjithmonë i lartë në një përballje të tillë prestigji, mungesa e vazhdimësisë është reflektuar qartë në tabelën e klasifikimit pas shtatë javëve të para, ku shkodranët numërojnë 5 pikë, ndërsa bardheblutë kanë grumbulluar 11 pikë. Në prag të këtij takimi kyç në Shkodër, trajneri Csaba Laszlo synon të përsërisë suksesin e arritur ndaj Dinamos për të siguruar fitoren, ndërsa nga ana tjetër, Dean Klafuriç shpreson që grupi i tij të dhurojë maksimumin në këtë transfertë të vështirë, duke lënë pas paraqitjen e fundit në Vorë përballë Laçit.