Superliga e Basketbollit: Besëlidhja, Vllaznia dhe Teuta konfirmojnë dominimin, Tirana pëson humbjen e radhës

Java e dytë e Superligës së basketbollit për meshkuj ka sjellë emocione të mëdha, kthesa spektakolare në rezultat dhe sfida të luftuara fort deri në sekondat e fundit. Skuadrat pretendente si Besëlidhja, Vllaznia dhe Teuta kanë arritur të sigurojnë fitoren e dytë radhazi, duke kryesuar bindshëm renditjen. Kampionët në fuqi të Besëlidhjes kanë kaluar një provë të vështirë në transfertën e Korçës, ku mposhtën Skënderbeun vendas me rezultatin 97-88. Pjesa e parë solli surpriza, me korçarët që mbyllën 20-minutëshin e parë në avantazh 52-48. Megjithatë, lezhjanët reaguan fuqishëm në fraksionin e dytë, duke u mbështetur te loja e organizuar kolektive, ku spikatën pesë lojtarë që regjistruan mbi 10 pikë secili. Në krahun tjetër, Tirana vazhdon të kalojë një moment delikat, duke regjistruar humbjen e radhës pas një ndeshjeje dramatike ndaj Elbasanit, e cila u mbyll me shifrat 89-86 për vendasit. Fati i takimit u vulos në periodën e fundit, falë paraqitjes fantastike të Thompson, i cili realizoi 32 pikë, i mbështetur edhe nga Alban Çela me 24 pikë të tjera. Në ndeshjet e tjera të kësaj jave, Vllaznia nuk ka gabuar në udhëtimin drejt liqenit, duke triumfuar pastër 69-54 ndaj Pogradecit, ku protagonist absolut ishte Hibbitt me 22 pikë të shënuara. Debutim pozitiv në këtë sezon ka regjistruar edhe Apolonia, e cila mposhti Flamurtarin me rezultatin 84-70, e udhëhequr nga dysha e huaj Thames-Lane, autorë të 42 pikëve së bashku. Teuta ka treguar forcën e saj në kryeqytet, duke mposhtur Partizanin me rezultatin e thellë 89-62. Edhe pse pjesa e parë ishte e ekuilibruar, durrsakët ngritën ritmin ndjeshëm në gjysmën e dytë të takimit, ku u dallua Fisher me një performancë të shkëlqyer prej 21 pikësh dhe 18 rebound-esh. Rezultatet e ndeshjeve të javës së dytë: Flamurtari – Apolonia: 70-84 Pogradeci – Vllaznia: 54-69 Skënderbeu – Besëlidhja: 88-97 Renditja aktuale e kampionatit kryesohet nga Besëlidhja, Vllaznia dhe Teuta me nga 4 pikë secila, të ndjekura nga Skënderbeu dhe Elbasani me 3 pikë, ndërsa Kamza Basket, Pogradeci, Tirana, Flamurtari, Partizani dhe Apolonia renditen me nga 2 pikë.