Universiteti i Korçës ende pa konsensus, studentët e ndarë mes bojkotit dhe bankave të shkollës

Gjatë ditës së martë, të rinjtë e Universitetit të Korçës janë mbledhur në një takim për të shqyrtuar mundësinë e bashkimit me protestat e nisura pesë ditë më parë në qytet, të cilat udhëhiqen kryesisht nga nxënës të shkollave të mesme dhe qytetarë. Pas një debati që ka zgjatur rreth një orë e gjysmë, palët nuk kanë arritur të dakordohen, duke lënë pa një vendim përfundimtar hapat e tyre të mëtejshëm. Sipas informacioneve nga Këshilli Studentor, qëndrimet kanë qenë krejtësisht të ndryshme: një pjesë e studentëve kërkuan bojkotim total të leksioneve, të tjerë propozuan protestë vetëm pas përfundimit të orarit akademik, ndërsa pati edhe zëra që kundërshtuan rreptësisht çdo lloj bojkotimi apo angazhimi në tubime. Asnjë prej përfaqësuesve të studentëve apo anëtarëve të Këshillit Studentor nuk ka pranuar të japë deklarata zyrtare përfaqësuesve të mediave. Megjithatë, të njëjtat burime bëjnë me dije se në vijim do të konsultohen edhe me studentët që mungonin në këtë takim, me qëllim arritjen e një qëndrimi unifikues.