Tragjedi në Harkiv: Një sulm me dron rus në park lë gjashtë të vrarë, mes tyre edhe fëmijë

Gjashtë persona, përfshirë edhe fëmijë, kanë humbur jetën tragjikisht pasi një dron i ushtrisë ruse goditi një park në rajonin verilindor të Harkivit në Ukrainë, konfirmuan autoritetet vendase më 19 tetor. Presidenti i Ukrainës, Volodymyr Zelensky, e ka cilësuar këtë sulm si një “mizori” të papranueshme. Nëpërmjet një postimi në rrjetin social Facebook, ai theksoi se mjeti fluturues pa pilot “goditi direkt njerëzit në një park afër një kafeneje”. Në mesin e viktimave ishte edhe një vogëlushe njëvjeçare, shtoi ai, duke shpërndarë një fotografi të vajzës së ndjerë teksa ndodhej në karrocën e fëmijëve. Ngjarja e rëndë ndodhi në parkun qendror të Nova Vodollagës, vend ky që ndodhet në rajonin e Harkivit, ndërsa nga ky sulm humbi jetën edhe nëna e foshnjës. Ky qytet, i vendosur në afërsi të vijës së frontit, numëronte rreth 10.000 banorë para se Rusia të ndërmerrte pushtimin në shkallë të plotë të Ukrainës në vitin 2022. Guvernatori i rajonit të Harkivit, Oleg Synegubov, bëri të ditur përmes një njoftimi në Telegram se mes viktimave janë gjithsej tre fëmijë, ndërsa 15 persona të tjerë kanë pësuar lëndime, ku shtatë prej të plagosurve janë gjithashtu të mitur. Në një reagim të mëparshëm të publikuar po në Telegram, Synegubov e quajti ngjarjen “një tjetër akt terrorist nga Federata Ruse”. “Armiku godet një park rekreativ në mes të ditës, duke e ditur se aty nuk ka fare infrastrukturë ushtarake”, u shpreh ai. Edhe strukturat policore të Harkivit shpërndanë në Telegram pamje fotografike ku dukeshin qartë një karrocë e djegur, pajisje të shkatërruara të këndit të lojërave dhe një ndërtesë prej druri në prag të shembjes totale. Në anën tjetër, kreu i shtetit ukrainas ka përsëritur thirrjen urgjente drejtuar partnerëve ndërkombëtarë të Kievit për të siguruar sisteme shtesë të mbrojtjes ajrore, në një periudhë kur tensionet me presidentin amerikan, Donald Trump, janë në rritje. “Kërkojmë që sanksionet ndaj Rusisë të mbeten në fuqi për sa kohë që vazhdojnë vrasjet. Kërkojmë që Amerika të jetë e fortë”, deklaroi Zelensky, i cili më parë pati kritikuar vendimin e Uashingtonit për heqjen e disa masave ndëshkuese ndaj Moskës. Ndërkohë, autoritetet e instaluara nga Rusia në rajonin lindor të Luhanskut njoftuan se tre persona tjerë u vranë të hënën, si pasojë e një sulmi ukrainas që goditi një automjet të dedikuar për transportimin e arkivoleve. “Një sulm ukrainas shënjestroi një automjet të shërbimit funeral që po transportonte një person të vdekur. Ky sulm u mori jetën tre personave”, u shpreh në Telegram Leonid Pasechnik, udhëheqësi rajonal i vendosur nga Moska.