Partneriteti në mbrojtje, Maqedonci pret në takim diplomatin e ri francez Jean-François Huchet

Ministri i Mbrojtjes i Kosovës, Ejup Maqedonci, ka zhvilluar sot një takim zyrtar me ambasadorin e sapoemëruar të Francës në vendin tonë, Jean-François Huchet, ku në qendër të diskutimit ka qenë forcimi i marrëdhënieve dypalëshe në sektorin e sigurisë. Sipas komunikatës zyrtare të dikasterit të mbrojtjes, diplomati francez Huchet i ka përcjellë urimet e tij ministrit Maqedonci për detyrën e re, duke ritheksuar përkushtimin e Parisit zyrtar për të intensifikuar bashkëpunimin ndërshtetëror në fushën e mbrojtjes, në bashkërendim të ngushtë me Ministrinë e Mbrojtjes të Francës. Në fjalën e tij, ministri Maqedonci ka shprehur mirënjohjen për mbështetjen dhe gatishmërinë e palës franceze, duke vënë iners në domosdoshmërinë e zgjerimit të partneritetit, me theks të veçantë te programet e trajnimit, edukimi ushtarak profesional dhe bashkëpunimi në fushën e industrisë së mbrojtjes. "Gjithashtu, e njoftoi për zhvillimin e kapaciteteve të Forcës së Sigurisë së Kosovës (FSK), Programin e Mbrojtjes Gjithëpërfshirëse dhe avancimin e kapaciteteve për prodhimin e municioneve", bëhet e ditur në njoftim. Në këtë takim u theksua se Franca vazhdon të jetë një mbështetës kyç dhe aleat strategjik i Republikës së Kosovës, duke dhënë një kontribut të çmuar në të gjitha proceset vendimtare të ndërtimit të shtetit dhe forcimit të institucioneve tona. Në përfundim të takimit, nga Ministria e Mbrojtjes u bë e ditur se qëllimi kryesor mbetet ngritja e këtij partneriteti në nivele më të larta, me fokus të veçantë te ngritja e kapaciteteve operacionale dhe mbrojtëse të vendit.