Biseda telefonike: Papa Leo i bën thirrje Zelenskyt për koordinim me Rusinë rreth ndihmave humanitare në Oleshky

Kreu i Kishës Katolike, Papa Leo XIV, ka zhvilluar një bisedë telefonike me kreun e shtetit ukrainas, Volodymyr Zelensky, ku ka kërkuar vendosjen e një bashkëpunimi mes Kievit dhe Moskës. Qëllimi i kësaj nisme është sigurimi i kalimit të ushqimeve dhe ilaçeve drejt qytetit të pushtuar të Oleshky-t. Sipas Selisë së Shenjtë, ekziston dëshira e thellë që ndihmat urgjente të mbërrijnë te popullata vendase, si dhe të garantohet një korridor i sigurt evakuimi për të gjithë ata qytetarë që duan të largohen nga zonat e konfliktit. Nga ana e tij, presidenti Zelensky ka bërë të ditur se autoritetet ukrainase po punojnë intensivisht për të gjetur një formulë konkrete që do t'u vijë në ndihmë banorëve të prekur. Temë bosht e diskutimit mes tyre kanë qenë gjithashtu sfidat e sigurisë dhe vala e fundit e sulmeve ushtarake nga ana e Rusisë. Kjo thirrje vjen vetëm tri ditë pasi Ati i Shenjtë i pati drejtuar një kërkesë publike presidentit rus Vladimir Putin për shpalljen e një armëpushimi, ndërkohë që nga ana e Kremlinit pati sinjale pozitive për bashkëpunim lidhur me shpërndarjen e furnizimeve jetësore.