Ndërhyrjet e huaja në Shqipëri, Taulant Balla zbardh lidhjet e dyshimta të lëvizjeve politike

Kreu i Grupit Parlamentar të Partisë Socialiste, Taulant Balla, ka hedhur dritë mbi një sërë kërcënimesh hibride që po cenojnë sigurinë kombëtare të Shqipërisë, duke vënë theksin te ndikimi i shteteve si Irani dhe Rusia. Sipas tij, vendi ynë është vënë në shënjestër të sulmeve të vazhdueshme që prej vitit 2022. Balla bëri përgjegjës direkt Iranin për nxitjen e tensioneve që i paraprinë të ashtuquajturit “revolucion i flamingove”. Ai nënvizoi se çdo informacion që lidhet me këto ndërhyrje kërkon një verifikim të imtësishëm brenda strukturave të NATO-s përpara se të bëhet publik. “Deklaroj me përgjegjësi të plotë se gjatë gjithë periudhës që shpuri te revolucioni flamingo, Irani ka qenë drejtpërdrejt i përfshirë, duke promovuar një agjendë me bazë antisemite”, u shpreh ai gjatë një interviste televizive. Në një tjetër zhvillim, zyrtari socialist ka shigjetuar lëvizjen “Antifa” në Tiranë, duke e identifikuar atë me figura si Arlind Qori dhe bashkëpunëtorë të tij. Balla ngriti pikëpyetje të forta mbi orientimin e këtyre grupeve dhe lidhjet e tyre të mundshme me interesa të huaja. Në të njëjtën linjë, Balla akuzoi edhe një eksponente të lartë të partisë së Agron Shehajt, duke pretenduar se ajo ndjek në mënyrë të vazhdueshme dhe sistematike faqen zyrtare të Ambasadës Ruse në Tiranë. “Shikoni se kush është Antifa e Tiranës, nga Arlind Qori me shokë. Si ka mundësi që numri dy i partisë së Agron Shehajt është ndjekësja më e rregullt e deklaratave të ambasadës ruse?”, përfundoi Balla, duke kërkuar më shumë transparencë mbi këto dinamika politike.