Agjenda e ngjarjeve për 20 tetor: Samiti i Ballkanit, mbledhje komisionesh dhe aktivitete publike në Prishtinë

Për sot, më 20 tetor, është paraparë një agjenci e ngjeshur me zhvillime institucionale, politike dhe shoqërore në kryeqytet. Ndër ngjarjet kryesore spikat dita e dytë e punimeve të Samitit të Ballkanit, e cila do të zhvillohet në hotel “Emerald” duke filluar nga ora 10:00. Në të njëjtën kohë, Kuvendi i Kosovës do të jetë qendra e diskutimeve përmes komisioneve parlamentare. Në orën 10:00, në sallën N-10, Komisioni për Ekonomi, Industri, Ndërmarrësi, Tregti dhe Inovacion do të analizojë Planin e Punës për sesionin vjeshtor të vitit 2026 dhe do të miratojë ngritjen e grupeve punuese për projektligjet në shqyrtim. Po në orën 10:00, në sallën N-302, Komisioni për Shëndetësi do të merret me shqyrtimin e Projektligjit për ndryshimin dhe plotësimin e Ligjit mbi ndarjet buxhetore për Buxhetin e Kosovës për vitin 2026. Më vonë gjatë paradites, në orën 11:00, në sallën N-303, anëtarët e Këshillit të Pavarur Mbikëqyrës për Shërbimin Civil të Kosovës do të paraqesin raportin e tyre para Komisionit për Administratë Publike, Digjitalizim, Pushtet Lokal, Media dhe Zhvillim Rajonal. Në orën 12:00, në Qendrën e Mjekësisë Urgjente (QMU) në Prishtinë, Kolegji i Kirurgëve të Kosovës do të mbajë ceremoninë e promulgimit dhe pavarësimit të programit ATLS Kosova. Në këtë ngjarje është konfirmuar edhe prania e ministrit të Shëndetësisë, Arben Vitia. Ndërkaq, në orën 15:00, organizata "Action for Mothers and Children" (AMC) do të mbledhë në sheshin “Zahir Pajaziti”, pranë amfiteatrit, personat që jetojnë me diabet të tipit 1 dhe familjarët e tyre, për një ngjarje kushtuar ndarjes së përvojave dhe historive personale.