Përplasja politike/ Gacaferi i kthen përgjigje Haradinajt: Drejtësia duhet të nisë te zbardhja e mbi 1 mijë vrasjeve të pasluftës

Luan Gacaferi, anëtar i partisë Guxo, i është kundërpërgjigjur ashpër deputetit të Aleancës për Ardhmërinë e Kosovës (AAK), Ramush Haradinaj, pas deklaratave të këtij të fundit se kreu i ekzekutivit duhet të ballafaqohet me hetime për urdhrin e pretenduar lidhur me sulmet ndaj qytetarëve. Reagimi i Gacaferit është fokusuar te sistemi i drejtësisë dhe nevoja për llogaridhënie institucionale. Sipas tij, prioritet i organeve të rendit do të duhej të ishte zbardhja e krimeve të pazgjidhura të pasluftës në vend. "Po të kishim pasur prokurorë si duhet, së pari do të duhej të ishin zbardhur mbi 1 mijë vrasje të shqiptarëve pas luftës në Kosovë", ka shkruar ai, duke shtuar se bëhet fjalë për humbjen e jetëve të personaliteteve të shquara, përfshirë intelektualë, ish-luftëtarë dhe komandantë të Ushtrisë Çlirimtare të Kosovës, aktivistë të Lidhjes Demokratike të Kosovës, si dhe kryetarë komunash. Në reagimin e tij, Gacaferi ka hapur edhe çështjen e pasurisë së pajustifikuar të zyrtarëve të lartë shtetërorë. Ai ka theksuar se me paga zyrtare prej një mijë eurosh, nuk do të shiheshin deputetë që hyjnë në Kuvend me automjete luksoze të markave 'Maybach' dhe 'Porsche', vlera e të cilave kalon shifrën e 160 mijë eurove. Në përmbyllje të qëndrimit të tij publik, Gacaferi ka përcjellë një mesazh mbi funksionimin e vonuar por të pashmangshëm të ligjit, duke shkruar: "Sidoqoftë, e drejtësia nganjëherë edhe vonon, por kurrë nuk harron!"