Tensionet në Shqipëri, Haradinaj: Ngjarjet atje i përjetojmë me dhimbje si familje

Ish-kryetari i Aleancës për Ardhmërinë e Kosovës, Ramush Haradinaj, ka shprehur shqetësimin e tij të thellë lidhur me situatën e tensionuar dhe përplasjet e fundit që po shoqërojnë protestat në Shqipëri. I ftuar në emisionin “Debat Plus”, Haradinaj theksoi se ngjarjet në Tiranë po përcillen me ndjenja ankthi dhe dhimbjeje në Kosovë, duke bërë thirrje që kategoria e dialogut politik të mbizotërojë mbi çdo formë dhune, me synimin e vetëm shmangien e pasojave tragjike. “Me dhimbje po i përcjelli zhvillimet atje. Lutem që të arrihet një zgjidhje për atë gjendje politike, pa dhunë. Shpresoj pa viktima”, u shpreh ai gjatë intervistës. Duke e vënë theksin te lidhjet e forta emocionale mes dy vendeve, politikani kosovar vlerësoi se çdo ngjarje negative në Shqipëri përjetohet rëndë nga qytetarët e Kosovës. “Na dhemb sikur ta kishim në familje, gjithë atë që po ndodh”, shtoi më tej ai. Në këtë linjë, Haradinaj u drejtoi një apel urgjent të dyja palëve, si strukturave shtetërore ashtu edhe qytetarëve protestues, që të tregojnë maturi dhe të ulen në tryezën e marrëveshjeve për të qetësuar ambientin politik. “Lutem të gjithëve, vëllezërve e motrave, edhe institucioneve edhe protestuesve, që të arrihet një marrëveshje e të ndalet kjo situatë”, u shpreh ai. Në mbyllje të prononcimit të tij, kreu i AAK-ja ka përcjellë urimin dhe besimin se Shqipëria do të dijë të lërë pas këtë krizë aktuale, duke iu rikthyer stabilitetit dhe rrjedhës normale të proceseve demokratike.