Prishja e gypit lë pa ujë disa rrugë të “Bregut të Diellit”, punimet zgjasin deri nesër

Banorët e lagjes “Bregu i Diellit” në kryeqytet do të përballen mbrëmjen e sotme me ndërprerje të furnizimit me ujë të pijshëm. Shkak për këtë situatë është bërë dëmtimi i një gypi të ujësjellësit me diametër DN 150 mm në këtë zonë, njofton Kompania Rajonale e Ujësjellësit "Prishtina". Si pasojë e këtij defekti teknik, pa ujë do të mbeten konsumatorët që jetojnë përgjatë rrugëve “Hyzri Talla”, “Ilir Durmishi”, “Besa”, “Fadil Ferati”, si dhe në zonën e Qendrës Tregtare. Nga ana e kompanisë bëhet e ditur se natyra e ndërhyrjes është mjaft e komplikuar, prandaj sanimi i plotë i dëmtimit dhe normalizimi i furnizimit me ujë parashikohet të ndodhë gjatë ditës së nesërme. Ndërkaq, Kompania Rajonale e Ujësjellësit "Prishtina" ka shprehur falënderimet e saj për konsumatorët, duke kërkuar mirëkuptimin e tyre për këto momente të krijuara nga ndërprerja e papritur.