Tentuan të kalonin 91 kg kanabis drejt Greqisë, pranga çiftit nga Tirana në Kakavijë

Një operacion antidrogë i finalizuar me sukses mëngjesin e sotëm në pikën kalimit kufitar të Kakavijës ka çuar në arrestimin e dy bashkëshortëve nga Tirana, pasi u kapën me një sasi prej 91 kilogramësh lëndë narkotike të dyshuar cannabis sativa. Veprimi i shpejtë i Policisë Kufitare u kurorëzua përmes operacionit të koduar “Risku 1”, i cili erdhi si rezultat i kontrolleve të shtuara dhe analizës së detajuar të riskut. Sipas njoftimit zyrtar, shërbimet e kufirit, në bashkëpunim të ngushtë me specialistët për Hetimin e Narkotikëve në Drejtorinë Vendore të Policisë Gjirokastër, përzgjodhën për një kontroll më të imtësishëm në vijën e dytë dhe në skaner një furgon që drejtohej nga 28-vjeçari K. A. Gjatë verifikimeve me pajisje moderne, autoritetet zbuluan se në dyshemenë e mjetit ishin krijuar hapësira të posaçme fshehjeje. Në brendësi të këtyre vendeve të sajuara u gjetën dhe u sekuestruan rreth 88 pako të mbushura me lëndë narkotike kanabis, pesha totale e së cilës arriti në rreth 91 kilogramë. Krahas lëndës së paligjshme, uniformat blu sekuestruan edhe furgonin e përdorur për transportin e saj, i cili kishte për destinacion shtetin grek. Në përfundim të veprimeve të para hetimore, specialistët e antidrogës në Gjirokastër bënë arrestimin në flagrancë të drejtuesit të mjetit, 28-vjeçarit K. A., si dhe të pasagjeres, bashkëshortes së tij 25-vjeçare B. A., të dy banues në qytetin e Tiranës. Grupi hetimor, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, po vijon intensivisht hetimet për të zbardhur plotësisht rrjetin kriminal dhe për të identifikuar persona të tjerë të përfshirë në këtë tentativë trafiku ndërkombëtar. Materialet procedurale i kanë kaluar prokurorisë për veprën penale “Trafikimi i lëndëve narkotike”.