Aspiratat e reja në LDK: Përparim Rama shpreh gatishmërinë për të marrë frenat e partisë

Kryetari i Komunës së Prishtinës, Përparim Rama, ka bërë të ditur se është plotësisht i hapur për të marrë drejtimin e Lidhjes Demokratike të Kosovës (LDK), duke shprehur gatishmërinë e plotë për një angazhim të tillë madhor. Gjatë një paraqitjeje televizive në emisionin “DPT te Fidani”, Rama konfirmoi se për këtë çështje ka zhvilluar biseda paraprake si me kryetarin aktual të partisë, Lumir Abdixhiku, ashtu edhe me figura të tjera të rëndësishme brenda strukturave politike të këtij subjekti. “Unë i kam ndihmuar Lidhjes Demokratike të Kosovës. Pas 12 viteve, LDK është e para në kryeqytet, dhe e kam ofruar, po them, ndihmën time gjatë gjithë kohës dhe vazhdoj me e ofru këtë ndihmë. Normal që jam i interesuar me i ndihmu Lidhjes Demokratike të Kosovës, dhe me nxjerr prej aty ku është. Si gjithmonë, kam qenë aty për ta, jam aty për ta, do të jem aty për ta”, u shpreh Rama. Megjithatë, kreu i kryeqytetit ka sqaruar se pavarësisht vullnetit të tij për të kontribuar në këtë nivel, ai ende nuk ka marrë një vendim përfundimtar lidhur me kandidaturën e tij zyrtare për të parin e partisë në zgjedhjet e ardhshme të brendshme. “Ende nuk e kam marr vendimin, por besoj që po!”, tha ai në përmbyllje të deklaratës së tij.