Kandidimi për kryeministër? Përparim Rama sqaron qëndrimin dhe paralajmëron betejë kundër bllokadave qendrore

Kryetari i Prishtinës, Përparim Rama, i ftuar në një intervistë televizive, është ndalur sërish tek deklarata e tij e bujshme për një mundësi kandidimi për postin e kryeministrit të Kosovës, duke dhënë detaje shtesë mbi motivet e këtij hapi. Rama theksoi se nëse pengesat për zhvillimin e kryeqytetit vijnë nga pushteti qendror, ai do të jetë në ballë të luftës kundër këtyre keqpërdorimeve. "E kam thënë edhe më parë, se unë jam kthyer këtu për t'i shërbyer vendit tim dhe kryeqytetit. Të gjitha projektet që kam prezantuar mund të realizohen brenda dy mandateve, ndaj nuk e kam pasur kurrë qëllimin për të synuar pozita më të larta," u shpreh ai. Megjithatë, ai shtoi se vizioni i tij ishte bashkëpunimi me liderë normalë, të votuar nga qytetarët, të cilët duan vendin, janë konstruktivë dhe nuk vuajnë nga egocentrizmi apo qasjet shkatërruese. "Kur shoh se ekziston një tendencë e qartë sabotuese dhe bllokuese, kuptohet qartë se ku qëndron problemi. Nëse konstatoj se pengesa kryesore qëndron pikërisht te keqpërdorimet në nivelin qendror, atëherë qytetarët do të më shohin aty, duke e luftuar këtë dukuri në çdo nivel," përfundoi kreu i Prishtinës.