Përparim Rama lëshon akuza të forta ndaj pushtetit qendror: Vetëvendosje funksionon si një sekt

Kryetari i Prishtinës, Përparim Rama, ka drejtuar kritika të ashpra ndaj Lëvizjes Vetëvendosje dhe ekzekutivit qendror, duke e vënë theksin te bllokimi i nismave kyçe për zhvillimin e qytetit. Gjatë një paraqitjeje televizive në emisionin “DPT te Fidani” në Klan Kosova, i pari i kryeqytetit e ka konsideruar subjektin e udhëhequr nga Albin Kurti jo si një organizim të mirëfilltë politik, por si një strukturë me tipare sekti, e cila, sipas tij, mbështetet te metodat e shantazhit dhe frikësimit për të penguar zhvillimin e Prishtinës. “Këta nuk janë as parti politike. Unë e kam thënë që tri vite që ky është një lloj sekti. Domethënë njëfarë mendësie e mbrapshtë që vetëm saboton, shantazhon, frikëson, e përdor frikën si një mjet të fortë për me i shti njerëzit me u bërë me ta në bazë të frikës”, është shprehur Rama në deklaratën e tij. Kryetari i Prishtinës shtoi se përgjatë dy viteve të para të qeverisjes së tij ka shtrirë vazhdimisht dorën e bashkëpunimit drejt nivelit qendror, duke kujtuar se si ai ashtu edhe kryeministri Albin Kurti kanë marrë mandatin nga qytetarët për t'u shërbyer atyre, e jo për të hyrë në përleshje politike. Megjithatë, ai vuri në pah se nga ana e qeverisë nuk ka pasur kurrfarë gatishmërie për dialog apo koordinim institucional. Në vijim të fjalës së tij, kreu i komunës renditi një varg projektesh të rëndësishme infrastrukturore të cilat, sipas tij, po përballen vazhdimisht me pengesa dhe bllokada të qëllimshme nga pushteti qendror.