Revolucion te Peja: Zëvendësohet trajneri dhe bëhen ndryshime të mëdha në skuadër pas nisjes së vështirë

Klubi i basketbollit Peja ka ndërmarrë hapa konkretë për të kaluar krizën, duke zyrtarizuar emërimin e trajnerit të ri me përvojë ndërkombëtare, pasi u ndanë rrugët me Michalis Kakiouzis. Drejtuesit e klubit nuk kanë humbur kohë për të gjetur zëvendësuesin e duhur në krye të shtabit teknik. Lajmi për këtë zhvillim të rëndësishëm është bërë i ditur zyrtarisht nga vetë klubi përmes një njoftimi të publikuar në rrjetin social Facebook. Strategu i ri, Radovic, mbart një bagazh të pasur suksesesh, ku spikat udhëheqja e Kombëtares së Malit të Zi drejt vendit të 11-të në Kampionatin Botëror FIBA 2023. Nën drejtimin e tij, malazezët arritën gjithashtu në fazën e eliminimit direkt në EuroBasket 2022, duke u pozicionuar mes 16 kombëtareve më të mira të kontinentit, krahas paraqitjes në Lojërat Olimpike. CV-ja e tij pasurohet edhe nga fitoret mbresëlënëse ndaj fuqive të mëdha të basketbollit evropian si Franca, Greqia, Lituania dhe Sllovenia. Përveç ndryshimit në bankinë, Peja ka ndërmarrë lëvizje drastike edhe në përbërjen e lojtarëve. Klubi ka njoftuar largimin e dyshes amerikane Robert Smith dhe Trevor Moore. Pavarësisht se patën paraqitje individuale mbresëlënëse dhe shifra fantastike në pesë sfidat e para të Superligës, bashkëpunimi i tyre ka marrë fund. Statistikat tregojnë se Smith ka regjistruar një mesatare prej 25.7 pikësh për ndeshje, ndërsa Moore ka kontribuar me 14.3 pikë për duel. Për të mbuluar këto boshllëqe, drejtuesit pejanë kanë siguruar rikthimin e Daquan Bracey, i cili ishte pikërisht lideri dhe lojtari më i spikatur i skuadrës verdhezi gjatë edicionit të kaluar. Bracey kishte mbyllur sezonin e shkuar me mesatare prej 16.1 pikësh për ndeshje, duke qenë një nga faktorët kryesorë që dërgoi Pejën deri në gjysmëfinalen e play-off-it, ku u ndalën nga Trepça pas një serie prej 3:1. Këto ndryshime rrënjësore në skuadër vijnë si pasojë e ecurisë jo të mirë, ku Peja ka regjistruar tri humbje radhazi në elitën e basketbollit vendor, dy prej të cilave kundër Vëllaznimit dhe Rahovecit, skuendra që synojnë mbijetesën. Gjithashtu, periudha negative u shoqërua edhe me dështimin në arenën ndërkombëtare, ku pejanët nuk arritën të kualifikohen në fazën e grupeve të FIBA Europe Cup, pasi u eliminuan nga Dinamo Bucharest pas dy humbjeve në përballjet direkte. Pas këtyre zhvillimeve, Peja pozicionohet aktualisht në vendin e gjashtë në tabelën e klasifikimit të Superligës, duke numëruar dy fitore dhe tri humbje në nisje të këtij edicioni.