“Heshtja është bashkëfajësi”: Pep Guardiola ngre zërin fuqishëm për dramën njerëzore në Gaza

Strategu i njohur i futbollit, Pep Guardiola, ka dalë hapur në mbrojtje të popullit palestinez, duke e cilësuar realitetin e rëndë humanitar në Gaza si një nga periudhat më të errëta të historisë bashkëkohore dhe duke kërkuar reagim mbarëbotëror kundër vuajtjeve të civilëve. Tekniku katalunas është përfshirë në një fushatë sensibilizuese të shpërndarë nga UNRWA Spanja (Agjencia e Kombeve të Bashkuara për Refugjatët Palestinezë në Lindjen e Afërt), ku ka adresuar pasojat e rënda të konfliktit dhe gjendjen kritike në të cilën ndodhen banorët e zonës. “Heshtja është një mënyrë për të mbajtur anën”, u shpreh ndër të tjera ish-trajneri i Barcelonës, Bayern Munichut dhe Manchester Cityt, duke apeluar që bota të mos bëjë sikur nuk i shikon padrejtësitë. Gjatë fjalës së tij, Guardiola tërhoqi vëmendjen se prapa statistikave të ftohta të viktimave fshihen qenie njerëzore me identitet, histori dhe të afërm, duke dënuar çdo përpjekje për të zbutur realitetin përmes gjuhës zyrtare ose ushtarake. “Nuk janë të vdekur, por njerëz të vrarë. Nuk janë shifra, por jetë që kishin emra, fytyra, familje dhe kujtime. Nuk janë dëme kolaterale, por fëmijë. Dhe kur ndalojmë t’i quajmë gjërat me emrin e tyre, kur pranojmë gjuhën që fsheh dhimbjen, fillojmë ta humbasim njerëzimin tonë”, u shpreh ai me shqetësim. Duke vijuar mesazhin e tij, trajneri i njohur kërkoi angazhim të vazhdueshëm qytetar dhe ndërgjegjësim kolektiv, duke theksuar se ndjeshmëria ndaj dhimbjes njerëzore nuk duhet të shuhet kurrë. “Solidariteti me Palestinën nuk mund të pushojë dhe as përgjegjësia jonë. Asnjë popull nuk duhet të kalojë breza të tërë duke dëshmuar aftësinë për ta përballuar vuajtjen, dhe asnjë fëmijëri nuk duhet të rritet duke mësuar si të mbijetojë para se të mësojë të jetojë”, shtoi Guardiola. Në mbyllje të mesazhit të tij, ai ftoi publikun që të mbështesë financiarisht dhe logjistikisht punën e UNRWA-s, me qëllim që ndihmat jetike të mbërrijnë sa më parë tek individët dhe familjet që ndodhen në nevojë urgjente.