Ylli i PSG-së therrë Yamalin para supersfidës, tregon edhe favoritin e tij për Topin e Artë

Mesfushori i Paris Saint-Germainit, Vitinha, ka ndarë mendimet e tij në prag të duelit të madh evropian kundër Barcelonës, duke u ndalur te forma e jashtëzakonshme e talentit spanjoll Lamine Yamal dhe te çmimi prestigjioz i Topit të Artë. Futbollisti portugez ka thurur eloga për paraqitjet e Yamalit, por ka bërë të qartë se parisienët janë të fokusuar te i gjithë ekipi katalunas dhe jo te një individ i vetëm. “Jo, nuk kam frikë nga Yamal. Ai është njëri prej lojtarëve më të mirë në botë dhe nuk do ta mohojmë këtë. Ajo që po bën aktualisht është e jashtëzakonshme. Është interesante të luash kundër lojtarëve të tillë. Por ne do të përballemi me një skuadër të madhe, jo vetëm me Lamine Yamalin. Barcelona është një ekip i mirë”, u shpreh Vitinha. Duke u zhvendosur te gara për Topin e Artë, 26-vjeçari ka dhënë një mendim të qartë se kush e meriton më shumë këtë trofe, duke sugjeruar se suksesi në Ligën e Kampionëve duhet të peshojë më rëndë. “Për mua, do të ishte më e drejtë që ta fitonte një lojtar i PSG-së, i cili e ka fituar Ligën e Kampionëve. Është e vërtetë se ka lojtarë të mëdhenj. Mendoj se Harry Kane ka pasur një sezon shumë të mirë, po ashtu Kylian Mbappe, Yamal dhe Olise. Por, për mua, më e drejta do të ishte që ta fitonte një parisien”, shtoi ai. Pavarësisht peshës që ka ky takim, mesfushori ka theksuar se kjo ndeshje nuk mund të quhet finale, pasi kalendari është ende në hapat e parë. “Finale? Është shumë herët për ta thënë këtë. Jemi në tetor dhe e dimë se sa shpejt mund të ndryshojnë gjërat. Tetori nuk është i njëjtë me marsin. Është një ndeshje e madhe që mezi presim ta luajmë. Për mua, PSG-ja, Barcelona dhe Bayerni janë tri prej skuadrave më të mira në Evropë”, theksoi portugezi. Sa i përket aspektit personal, Vitinha u shpreh tejet i kënaqur me momentin që po kalon dhe synon ta dëshmojë këtë formë edhe në fushën e blertë. “Është një periudhë e mirë për mua individualisht. Jam në një moment të mirë dhe shpresoj ta vazhdoj edhe nesër”, tha ai. Në mbyllje të prononcimit, mesfushori parashikoi një betejë të vështirë taktike, duke theksuar se të dyja ekipet do të kërkojnë me çdo kusht zotërimin e topit dhe presionin e lartë ndaj kundërshtarit.