Ervin Demo: Protestat kanë kaluar çdo kufi, afro 300 të plagosur në gjashtë ditë

Ministri i Punëve të Brendshme, Ervin Demo, ka hedhur poshtë çdo lidhje mes tubimeve të fundit dhe kauzave studentore, duke e cilësuar nivelin e dhunës si të papranueshëm dhe të kaluar çdo vijë të kuqe. Gjatë një konference për shtyp, i shoqëruar nga efektivë të Policisë së Shtetit, ai denoncoi sulmet e drejtuara ndaj komisariateve dhe institucioneve publike, duke vënë në dukje se gjatë natës së kaluar punonjësit e rendit kanë pësuar lëndimë të rënda teksa ndodheshin në krye të detyrës për ruajtjen e objekteve. “Situata ka kaluar vijën e kuqe. Dje është sulmuar komisariati dhe punonjësit që kanë qenë aty janë dëmtuar deri në djegie. Kjo është e papranueshme dhe tregon se elementët e dhunës të përfshirë në këtë protestë kanë arritur në nivele që tregojnë se kjo nuk është më protestë studentore dhe nuk mund të quhet më protestë”, u shpreh ministri. Sipas të dhënave zyrtare të bëra publike nga ministri, bilanci i gjashtë ditëve të fundit flet për 295 persona që kanë marrë lëndime, mes të cilëve 186 janë efektivë policie. Ai saktësoi se të dëmtuarit përfshijnë gjithashtu qytetarë protestues, kalimtarë të rastit dhe përfaqësues të medias. “Janë 295 të lënduar në këto gjashtë ditët e fundit, 186 punonjës policie. Janë 295 shqiptarë që kanë pësuar dëmtime jo të lehta, policë, protestues, kalimtarë e gazetarë”, deklaroi Demo. Në fjalën e tij, kreu i ministrisë ngriti shqetësimin mbi heshtjen e skenës politike përballë akteve vandale, duke hedhur dyshime se disa prej individëve të dhunshëm gëzojnë mbështetjen e një force të caktuar politike. “Punonjësit e policisë kanë duruar dhunë barbare. Sot nuk kemi parë që forcat politike të dalin dhe të mbajnë qëndrim sa i përket kësaj dhune të kryer”, tha ai. Në mbyllje të deklaratës, Demo shprehu mirënjohjen e thellë për gatishmërinë dhe qetësinë e treguar nga uniformat blu, duke ritheksuar mbështetjen e pakushtëzuar të shtetit ndaj tyre. “Dhuna nuk ka vend në një shoqëri demokratike. Dhuna nuk është mjet negocimi. Ne jemi këtu për të mbrojtur atë që është më e shenjta: demokracinë shqiptare”, përfundoi ministri.