Merz i vendos vijat e kuqe SPD-së: Bashkëqeverisja nuk vazhdon me çdo kusht, përplasje për pensionet

Kancelari gjerman, Friedrich Merz, i ka dërguar një mesazh të qartë e të prerë partnerëve të tij në kabinetin qeveritar, duke theksuar se funksionimi i koalicionit nuk mund të mbahet me çdo kusht nëse braktisen parimet kryesore politike. Gjatë fjalës së tij në kongresin e Unionit të të Rinjve (Junge Union) në Bon, kreu i CDU-së nëvizoi nevojën për një profil më të qartë politik të partisë së tij. Edhe pse u shpreh se dëshiron që bashkëqeverisja me Partinë Socialdemokrate (SPD) të ketë sukses, Merz bëri me dije se kjo nuk mund të arrihet me çdo çmim, duke kujtuar se edhe për të ekzistojnë kufij. Ai kërkoi që të jetë e qartë se CDU-ja është partneri më i madh në koalicion, ndaj nuk do të pranojë kompromise që mund ta zbehin identitetin e saj. Në lidhje me skajet politike, kreu i qeverisë u distancua prerazi nga bashkëpunimi me të djathtën ekstreme të Alternativës për Gjermaninë (AfD), duke marrë shkak nga zhvillimet në Saksoni-Anhalt. Merz paralajmëroi se anëtarët e CDU-së që mbështesin përfaqësuesit e AfD-së për poste shtetërore nuk mund të kenë vend në parti, pas dyshimeve se disa deputetë të saj mund të kenë votuar kandidatin e kësaj të fundit për kryetar të parlamentit rajonal. Po ashtu, ai kritikoi SPD-në dhe të Gjelbrit për afrimin me të Majtën në Berlin, duke bërë thirrje që të ndërpriten bisedimet me forcat radikale. Ndër të tjera, kancelari ripërsëriti mbështetjen e palëkundur të CDU-së për të drejtën e shtetit të Izraelit për të ekzistuar, duke theksuar se antisemitizmi është i papranueshëm në Gjermani. Lidhur me reformat ekonomike e sociale, Merz kërkoi që vendimet për sistemin e pensioneve të miratohen brenda këtij viti sipas rekomandimeve të komisionit përkatës. Pika më e nxehtë e debatit mbetet propozimi për heqjen e pensionimit pa penalizime pas 45 vitesh kontribute, ide kjo që po kundërshtohet nga SPD-ja dhe tre kryeministra rajonalë të CDU-së. Megjithatë, Merz argumentoi se reformat e propozuara sjellin natyrshëm debate, por ato janë të nevojshme përpara se vendi të rikthehet në qetësi. Në mbyllje, kancelari kujtoi përplasjet e vitit të kaluar me delegatët e Unionit të të Rinjve për të njëjtën temë, duke kërkuar angazhimin e brezit të ri për miratimin e një reforme me peshë, e cila garanton drejtësinë ndërbreznore.