Kryeministri Rama ashpër kundër protestave të dhunshme: Nuk janë studentë, por adhurues të kaosit

Kryeministri i Shqipërisë, Edi Rama, ka dalë në një deklaratë publike krah forcave të Policisë së Shtetit, ku ka komentuar trazirat e dhunshme që kanë përfshirë vendin. Kreu i ekzekutivit ka qenë i prerë në qëndrimin e tij, duke theksuar se protestuesit që përdorin dhunë ndaj strukturave të rendit nuk kanë asnjë lidhje me lëvizjet studentore. Sipas shefit të qeverisë, pas këtyre akteve fshihen individë që ushqehen me rrëmujë dhe shkatërrim. Rama vuri në dukje se ndonëse protesta të ngjashme mund të ndodhin kudo në botë, si në Francë, Itali, Belgjikë apo Portugali, asnjë vend tjetër nuk ka skena ku forcat politike dalin hapur në mbrojtje të dhunuesve apo mbështesin sulmet me zjarr dhe gurë ndaj institucioneve. Ai e cilësoi si një fatkeqësi të rëndë kombëtare faktin që policia, e cila është në detyrë për të ruajtur rendin dhe sigurinë e shtetit, ndodhet jo vetëm në shënjestrën e gurëve të protestuesve, por edhe nën presionin e ekraneve. Kreu i qeverisë përshkroi portretin e atyre që fshihen pas maskave, duke i quajtur ata qenie të verbëra dhe viktima të rrethanave, të cilat adhurojnë koktejet molotov dhe llastiqet me vida për të dëmtuar efektivët, për t'iu turrur më pas bizneseve dhe dyqaneve të qytetarëve të ndershëm. Në fjalën e tij, Rama përmendi gjithashtu se kjo masë njerëzish, shpesh e ardhur nga periferitë me synimin për të shkatërruar qendrën, ka nevojë urgjente për vëmendje sociale dhe trajtim psikologjik. Ai shtoi se këta të rinj bien lehtësisht pre e manipulimit nga forca të caktuara, të cilat i cilësoi si armiq të Shqipërisë, duke u shërbyer interesave që përffitojnë në kurriz të shoqërisë.