Fitore dhe analiza nga Nevil Dede: Rotacioni dha efekt, por ndryshimet e shumta sollën vështirësi

Egnatia ka triumfuar me rezultatin 3-1 ndaj Vllaznisë, duke ulur kështu siparin e javës së 7-të të “Abissnet Superiore”. Menjëherë pas përfundimit të sfidës së luajtur në stadiumin e Rrogozhinës, trajnerit fitues, Nevil Dede, i është dashur të analizojë paraqitjen e skuadrës së tij përpara mediave. Duke iu përgjigjur pyetjeve rreth ecurisë së ndeshjes dhe një uljeje të mundshme të ritmit në fraksionin e dytë, kreu i stafit teknik të Egnatias theksoi vlerat e kundërshtarit. Sipas tij, lëvizjet e duhura nga trajneri i ri i Vllaznisë sollën vështirësi, megjithëse skuadra e tij ruajti kontrollin e situatës, pavarësisht konsumit fizik dhe psikologjik. “Është njerëzore dhe nuk mund të fshihemi pas gishtit. Ndonjëherë e stakojmë trurin kur luajmë në kampionat, ndërsa në ndeshjet e Conference League përqendrimi ndizet ndryshe,” u shpreh Dede, duke pranuar rritjen e lojës së shkodranëve në fushë. Tekniku i rrogozhinasve shtoi se ngarkesa dhe aftësia e Vllaznisë për të luajtur një për një i vunë në vështirësi, duke bërë që të humbiste koha e duhur në momentin e pasimit. Ai gjithashtu komentoi aspektin ofensiv dhe mbrojtës, duke theksuar se pësimi i golave e bën situatën më të mërzitshme dhe kërkon mbyllje të hapësirave me shumë forca në thellësi. Në përfundim të prononcimit të tij, Nevil Dede u ndal te ndryshimet e shumta në formacion, duke pranuar se aktivizimi i gjashtë lojtarëve të rinj nga stoli pati ndikimin e vet në mekanikën e skuadrës: “Rotacioni ishte i madh sot, por kur ndryshon 6 lojtarë, është e natyrshme që gjërat të mos shkojnë në perfeksion.”