Përplasjet në selinë blu, Berisha: Skenar i dështuar i Ramës, asnjë qytetar nuk na sulmoi

Kryetari i Partisë Demokratike, Sali Berisha, ka mbërritur në selinë e kësaj force politike, ku ka folur për zhvillimet dhe tensionet e fundit të regjistruara gjatë protestës. Gjatë një prononcimi për gazetarët, lideri i opozitës e ka cilësuar situatën si një skenar të mirëfilltë të përgatitur nga kryeministri Edi Rama, me qëllim që protestuesit të dukeshin sikur kishin ndërmarrë sulme ndaj selive të dy partive kryesore. “Njeriu që po përpiqet të përzgjedhë vendin e azilit politik, i them këtu që vendi i vetëm i azilit do të jetë qelia e burgut. Sot, ai përhap nëpërmjet rrjetit të tij në protestë, përhap lajmin që Kryeministrinë nuk e marrim dot, ndaj duhet të sulmohen dy selitë e partive të mëdha. Ai prandaj mori dhe futi brenda partisë së tij tre inspektorate, banditë të pajisur me hunj e mjete të tjera. Skenari i dështoi, sepse iniciatorët, ose puthadorët e Ramës nuk i ndoqi njeri. Dështoi të sillte protestuesit që shprehnin urrejtjen ndaj partisë së krimit. Natyrisht që nuk kishin motiv të vinin. Tani që i dështoi projekti, u përpoqën që selia e PD-së të sulmohej nga ora 8:30-9:30. Njerëzit e vërtetë në protestë nuk mund të manipuloheshin. Jagon e Edi Ramës e braktisën masivisht”, u shpreh Berisha. Më tej, ai ka denoncuar ndërhyrjen e forcave të rendit, duke e konsideruar atë si një akt hakmarrjeje për dështimin e planeve qeveritare dhe në kundërshtim të plotë me ligjin e Kushtetutën. “Kësaj here kur dështuan, ora erdhi dhe kur panë që skenari nuk po realizohej, policia në mënyrën më hakmarrëse dhunon territorin e Partisë Demokratike, në shkelje të ligjit dhe Kushtetutës. Jo vetëm që hedhin sasi të mëdha bombolash gazi, pa pasur motiv, vetëm reprezaljet e PD-së për dështimin e skenarit të tyre. I kanë helmuar njerëzit dhe ju e patë vetë. Nuk ka pasur asnjë tentativë nga asnjë protestues që të kryejë dëmin më të vogël ndaj kësaj partie. Paralajmëroj Edi Ramën se do të mbahen personalisht përgjegjës si manipulator të shpifur që bëjnë gjithçka brenda protestës kundër protestës. Demokratët janë në mosbindje civile më shumë se kurrë. Dhe jo vetëm në Tiranë”, shtoi kreu i PD-së. Në mbyllje të fjalës së tij, Berisha ndalur edhe te mbrojtja e të miturve, duke dënuar çdo akt dhune ndaj tyre dhe duke shprehur mbështetjen e plotë të partisë që ai drejton. “Çdo i mitur që sulmohet, është i mitur dhe do të mbrohet nga Partia Demokratike. Ata që sulmojnë të miturit, ata shkelin ligje dhe Kushtetutën e vendit. Unë i përgëzoj demokratët që i marrin në mbrojtje të miturit”, përfundoi Berisha.