Krizë rezultatesh në Tuz, Deçiqi synon kthesën e madhe ndaj Buduçnostit

Java e 11-të në Ligën e Parë të futbollit të Malit të Zi sjell në qendër të vëmendjes supersfidën e qytetit të Tuzit. Skuadra shqiptare e Deçiqit, e cila po kalon një fazë mjaft delikate, do të presë në shtëpi gjigantin nga Podgorica, Buduçnostin. Dueli mes dy rivalëve do të zhvillohet këtë pasdite, me fillim nga ora 18:00. Formacioni nga Tuzi po kalon ngërçin e parë të këtij edicioni garues, duke numëruar tashmë pesë takime radhazi pa shijuar suksesin, përfshirë edhe paraqitjet në Kupën e Malit të Zi. Statistikat tregojnë se ekipi vendës është në kërkim të tri pikëve prej afro dy muajsh. Triumfi i tyre i fundit daton në datën 30 gusht, kur mposhtën Jezeron me rezultatin 2:1. Që prej asaj periudhe, Deçiqi ka regjistruar humbje përballë Mladost Lob.bet dhe Sutjeskës, ka ndarë pikët në barazime ndaj Petrovacit dhe Mornarit, si dhe ka pësuar eliminimin nga Kupa e vendit pas gjuajtjes së penalltive sërish nga Sutjeska. Aktualisht, situata në tabelën e klasifikimit i sheh të dyja skuadrat në kuotën e 15 pikëve, me Buduçnostin që renditet në pozicionin e tretë, ndërsa Deçiqi pozicionohet në vendin e pestë.