Tensionet zhvendosen te Kryeministrja: Protestuesit pajisen me gurë dhe barriera metalike

Pavarësisht masave paraprake të ndërmarra në orët e para të mëngjesit nga ana e punonjësve të Bashkisë, të cilët ndërhynë për të pastruar trotuaret përgjatë Bulevardit “Dëshmorët e Kombit” me qëllim heqjen e mundësisë që protestuesit të përdornin materialet e kalldrëmit si mjete hedhëse ndaj efektivëve të rendit dhe institucioneve, turma ka arritur të sigurojë sërish gurë nga zona të tjera të kryeqytetit. Pas episodeve të dhunës dhe dëmtimit të regjistruar në selinë e Partisë Socialiste, grupi i protestuesit është zhvendosur dhe është grumbulluar në sheshin para ndërtesës së Kryeministrisë. Aktualisht, situata paraqitet e tensionuar, pasi protestuesit janë pozicionuar në terren të armatosur me gurë dhe të pajisur me barriera metalike, duke krijuar një linjë ballafaqimi. Në terren, për të menaxhuar situatën dhe për të garantuar sigurinë e institucionit, janë vendosur forca të shumta të policisë, të mbështetura nga dy autobotë me ujë, sipas raportimeve nga gazetarja Anila Hoxha.