Pas operacionit delikat: Papa Leo XIV shfaqet në publik dhe drejton lutjen e së dielës

Papa Leo XIV ka realizuar daljen e tij të parë të rëndësishme publike që prej ndërhyrjes kirurgjikale për kancer në mushkëri, duke udhëhequr tradicionalisht lutjen e së dielës. Kreu i Kishës Katolike ndau me besimtarët se kjo periudhë e vështirë shëndetësore i ka krijuar një ndjenjë edhe më të madhe solidariteti me të gjithë personat që përballen me sëmundje apo sfida të ndryshme fizike. Ai shprehu mirënjohjen e thellë ndaj ekipit mjekësor për kujdesin e treguar dhe falënderoi çdo besimtar për lutjet e tyre, duke paralajmëruar një rikthim gradual në agjendën e tij zyrtare. “Kjo përvojë më ka dhënë një ndjesi të thellë afërsie me të gjithë ata që po kalojnë një sëmundje ose një gjendje dobësie fizike. Tani që kjo fazë delikate ka kaluar, do t'i rifilloj gradualisht aktivitetet e mia – gjithmonë me ndihmën e Zotit dhe lutjet tuaja. Faleminderit edhe një herë”, u drejtua ai turmës së mbledhur në shesh. Kujtojmë se Ati i Shenjtë u largua nga spitali ditën e shtunë, pas një operacioni të suksesshëm në mushkëri për largimin e një mase, e cila pas analizave rezultoi të ishte adenokarcinomë, një formë e njohur e kancerit të mushkërive. Nga ana e tyre, mjekët konfirmuar se procesi i rikuperimit të Papa Leos po ecën në rrugën e duhur, duke lënë të kuptohet se ai do të jetë në gjendje të ndërmarrë vizitën e tij zyrtare në Amerikën Latine, e cila është parashikuar të zhvillohet nga data 6 deri më 17 nëntor.