Aurela Gaçe krah protestuesve: Më mirë një fund me dhimbje sesa vuajtje pa fund për rininë

Këngëtarja e njohur shqiptare, Aurela Gaçe, ka dhënë mbështetjen e saj për të rinjtë që protestojnë, duke sjellë në vëmendje sfidat dhe pasigurinë me të cilat përballet brezi i ri në Shqipëri. Reagimi i saj vjen në një kohë kur vendi është përfshirë nga vala e protestave kundër qeverisë. Nëpërmjet një postimi në rrjetet sociale, artistja ka ngritur pyetje retorike mbi arsyet e largimit masiv të trurit dhe forcës punëtore të vendit, duke theksuar se shpresa e të rinjve për të ndërtuar jetën në atdhe është zbehur ndjeshëm. “Kaq vështirë është të kuptojmë se rinia ka humbur shpresën për të ndërtuar të ardhmen këtu? Pse ikin? Pse duan të ikin? Kush na e jep përgjigjen? Kush është përgjegjës?”, ka shprehur ajo hapur shqetësimin e saj. Për të përçuar më fuqishëm mesazhin e saj, Gaçe ka ndarë gjithashtu vargje nga kënga e njohur e artistit të ndjerë Doktor Flori, e titulluar “Zemërthyer”. “Jam i papërfaqësuar, i parealizuar. Unë jam i tradhtuar, jam i nënvlerësua. Unë nuk jam pazar e as matematikë. O politikë e ndyrë jam me gjak, jam me shpirt. E kur fillon për keq të shkojë deri në fund. Më mirë një fund me dhimbje sesa dhimbje pafund”, citohen vargjet e përzgjedhura nga këngëtarja. Në mbyllje të reagimit të saj, ajo ka përcjellë një mesazh shprese për të ardhmen, duke vlerësuar se vendi mund të gjejë shpëtimin përmes besimit dhe solidaritetit: “E shohin një dritë të vogël, se më keq s’ka ku të shkojë. VETEM ME BESIM TEK ZOTI ky vend mund të shpëtojë”.