Zgjedhjet në Bërvenicë: Zyra e Avokatit të Popullit në Tetovë hap dyert për qytetarët

Në kuadër të procesit të zgjedhjeve të parakohshme për kryetar të Komunës së Bërvenicës, Zyra Rajonale e Avokatit të Popullit në Tetovë do të qëndrojë e hapur gjatë gjithë ditës së sotme, nga ora 07:00 deri në orën 19:00. Kjo masë është ndërmarrë me qëllim që votuesit të kenë një adresë zyrtare ku mund të paraqesin çdo parregullsi apo cenim të të drejtës së tyre për të votuar. Përveç paraqitjeve fizike drejtpërdrejt në ambientet e zyrës, institucioni ka vënë në dispozicion edhe linjën telefonike me numër 044 344-082, përmes së cilës qytetarët mund të denoncojnë çdo shkelje të mundshme të integritetit të procesit zgjedhor. “Avokati i Popullit do të mbrojë të drejtat e qytetarëve duke ndërmarrë masa urgjente për veprim efektiv nga organet kompetente në procesin zgjedhor dhe institucionet e tjera që janë të detyruara të sigurojnë mbrojtje të të drejtave të tyre të garantuara”, thuhet në kumtesën e këtij institucioni. Me këtë rast, nga ky institucion kujtojnë se e drejta e votës gëzon mbrojtje kushtetuese si një e drejtë e barabartë, universale dhe e drejtpërdrejtë, e cila realizohet përmes votimit të lirë dhe të fshehtë. Çdo tentativë për të kufizuar lirinë e zgjedhjes së qytetarëve, apo çfarëdolloj cënimi tjetër i kësaj të drejte, përbën vepër penale të dënueshme me ligj, ndaj askush nuk mund të mbahet përgjegjës për mënyrën se si e ushtron atë.