Tahiri me kritika të ashpra ndaj kryeministrit Rama: Jep dorëheqje, Shqipëria është në gjendje kritike

Ish-drejtuesja e negociatave të Kosovës, Edita Tahiri, ka reaguar me tone të ashpra lidhur me situatën politike dhe protestat e shoqëruara me incidente të shënuara në Shqipëri. Ajo i ka përshkruar zhvillimet e fundit në vend si jashtëzakonisht shqetësuese dhe me pasoja të rënda. Përmes një reagimi publik, Tahiri i ka bërë thirrje të drejtpërdrejtë kryeministrit Edi Rama që të largohet nga drejtimi i qeverisë, duke e akuzuar atë se po e dëmton rëndë të ardhmen e vendit. “Shqipëria në gjendje kritike, katastrofike – Ndalu Edi Rama, je verbëruar, jep dorëheqje, mos e shkatërro Shqipërinë – lëre rininë ta shkruajë historinë e Shqipërisë së re”, është shprehur prerazi Tahiri. Ndërkohë, vala e pakënaqësive qytetare po vijon, pasi gjatë ditës së sotme është paralajmëruar mbajtja e një tjetër proteste nga ana e studentëve.