Operacion në Fushë Kosovë: Kapen dy persona me mallra kontrabandë nga Maqedonia e Veriut

Policia e Kosovës ka arrestuar dy persona në Fushë Kosovë, pasi dyshohen se janë përfshirë në kontrabandimin e mallrave të ndryshme pa dokumentacionin përkatës. Sipas njoftimit zyrtar, ngjarja është regjistruar më 17 tetor, rreth orës 22:40. Gjatë një aksioni operacional, njësitë e Sektorit të Hetimeve të Policisë Kufitare kanë ndaluar për kontroll një automjet transportues me targa vendore, brenda të cilit ndodheshin dy të dyshuarit. Në vijim të kontrollit të detajuar të mjetit, autoritetet policore kanë zbuluar një sasi të madhe mallrash të llojeve të ndryshme. Mes produkteve të sekuestruara figurojnë barna, artikuj higjienikë, stoli, veshje, si dhe pajisje të ndryshme teknologjike, duke përfshirë kompjuterë, laptopë dhe telefona celularë. Në kuadër të procedurave hetimore, gjatë intervistimit nga organet e rendit, të dyshuarit kanë pranuar se mallrat e ngarkuara i kishin futur nga territori i Maqedonisë së Veriut, mirëpo nuk kanë arritur të paraqesin asnjë faturë apo dokument ligjor që dëshmon origjinën dhe importin e rregullt të tyre. Përveç mallrave, në cilësinë e provës materiale është sekuestruar edhe vetura transportuese, ndërkohë që rasti vijon të trajtohet nga strukturat kompetente.