Salihaj e krahason Ramën me Vuçiqin: Nuk tërhiqet nga pushteti edhe sikur të digjet gjithë Shqipëria

Tensioni politik dhe protestat e organizuara kundër ekzekutivit të kryeministrit Edi Rama në Shqipëri kanë hyrë në ditën e tyre të pestë, teksa skena në Tiranë është përshkallëzuar në përleshje fizike ndërmjet qytetarëve protestues dhe efektivëve të policisë. Kërkesa kryesore e turmës mbetet largimi i kabinetit qeveritar, ndërkohë që organizatorët dhe pjesëmarrësit ngrenë alarmin për nivelet e larta të korrupsionit, rritjen e papunësisë dhe gjendjen e rënduar në sistemin arsimor. Gjatë tubimeve, protestuesit kanë hedhur gurë dhe lëndë piroteknike drejt perimetrit të sigurisë dhe forcave të rendit, duke shkaktuar gjithashtu dëme materiale në objekte shtetërore, institucione bankare dhe biznese private. Në krahun tjetër, policia është kundërpërgjigjur duke përdorur gaz lotsjellës, autobote me ujë dhe granata shurdhuese me qëllim shpërndarjen e masës së irrituar. Lidhur me këto zhvillime, ish-deputeti i Kuvendit të Kosovës, Adem Salihaj, ka theksuar se protestat në Shqipëri, pavarësisht nisjes së tyre masive dhe paqësore, tashmë kanë dalë jashtë kontrollit dhe janë zgjeruar në disa rajone të tjera të vendit. Ai ka lëshuar akuza të ashpra në drejtim të qeverisjes aktuale, duke e cilësuar atë si një rrezik real për Shqipërinë dhe të ardhmen e mbarë kombit shqiptar. “Kur patën filluar protestat në Shqipëri, unë qesh shumë i gëzuar me masivitetin, frymën dhe kulturën e tyre. Ishte një ringjallje e pastër kombëtare, që i jepte shpresë gjithë kombit shqiptar, në kohën kur një pushtet i korruptuar deri në palcë, me një kryeministër që e ka më afër Beogradin se Prishtinën, ishte shndërruar në kërcënim serioz, jo vetëm për Republikën e Shqipërisë, por për të gjithë ne. Pas përpjekjeve të gjata e të pasuksesshme me protesta të qeta për ta detyruar Ramën të japë dorëheqje, ato eskaluan dhe tash kanë marrë kahje të protestave të pakontrolluara. Tashmë këto protesta nuk janë vetëm në Tiranë, por pothuajse në të gjitha qytetet e Shqipërisë”, ka deklaruar ai. Sipas Salihaj, kreu i qeverisë shqiptare nuk ka ndërmend të japë dorëheqje, pasi ruajtja e karriges mbetet interesi i tij i vetëm. Ai ka bërë thirrje për themelimin e një lëvizjeje të re mbarëkombëtare që synon ndryshimin përmes procesit zgjedhor, duke shtuar se rruga e dhunës dhe anarkisë nuk sjell zgjidhje. “A do të mund të detyrohet Rama të japë dorëheqje, për ta shpëtuar Shqipërinë nga shkatërrimi që po e përhapet anembanë? Unë besoj se Rama nuk brengoset aspak për Shqipërinë, ai e ka të vetmin fiksim pushtetin e tij. Madje, ai pretendon se po e mbron Shqipërinë dhe të ardhmen e saj. Natyrisht, është krejt e kundërta. Unë mendoj se Rama nuk do të japë dorëheqje edhe po të kallet e gjithë Shqipëria. Ai dhe Vuçiqi kanë shumë të përbashkëta, por një është e dukshme - ata nuk e lëshojnë pushtetin me asnjë kusht dhe pavarësisht çka ndodh. Prandaj shkatërrimi i Shqipërisë nuk është zgjidhje. Populli i Shqipërisë duhet ta krijojë një lëvizje të mirëfilltë kombëtare, me figura të pastra e atdhedashëse, e cila lëvizje, në zgjedhjet e ardhshme do t'i fitojë zgjedhjet dhe do ta shporru Ramën dhe kastën e tij nga pushteti. Mendoj se zgjidhje tjetër nuk ka. Anarkia nuk është zgjidhje”, është shprehur ndër të tjera Salihaj.