Rama zbulon pengimin e një sulmi me dron ndaj Kryeministrisë: Të rinjtë po përdoren si pengje nga "grupi i zjarrit"

Kreu i qeverisë, Edi Rama, ka bërë me dije se organet e sigurisë kanë arritur të neutralizojnë një dron të pajisur me lëndë shpërthyese gjatë zhvillimeve të ditëve të fundit. Sipas tij, mjeti fluturues kishte për qëllim goditjen e selisë së Kryeministrisë dhe ndezjen e një zjarri në oborrin e brendshëm të këtij institucioni. Kryeministri këmbëngul se tubimet e fundit tejkalojnë kuadrin e një revolte spontane rinore apo studentore. Ndonëse pranoi se kërkesa e të rinjve për ndryshim është e mirëkuptueshme, ai pretendon se protestuesit janë kthyer në veglat e një strukture të caktuar, të cilën e cilësoi si "grupi i zjarrit". Më tej, kreu i ekzekutivit hodhi akuza ndaj personave me maska që ndodhen në bulevard, duke deklaruar se ata po përdorin fëmijët dhe të miturit si mburojë gjatë përplasjeve. Lidhur me këtë situatë, Rama deklaroi: “Rinia dhe studentët janë të frustruar dhe të inatosur, duan ndryshim dhe është në natyrën e qënies së tyre, por me keqardhje them se kjo rini dhe këta studentë që janë në bulevard janë pengje të grupit të zjarrit në krye. Atyre me maska, ku përdoren gjerësisht edhe të miturit, si mburoja për të përparuar. Para 2 ditësh është neutralizuar një dron me eksploziv i destinuar të godiste Kryeministrinë duke i vënë zjarrin oborrit të brendshëm ku është ngrehina e drurit dhe një Zot e di me çfarë pasojash”.