Ngjarjet në Bulevard, Spahiu dënon ashpër aktet e dhunës ndaj uniformave blu

Zëvendëskryeministrja Klodiana Spahiu ka reaguar me tone të forta lidhur me incidentet e dhunshme të regjistruara gjatë protestës në Bulevardin “Dëshmorët e Kombit”, duke i cilësuar ato si të papranueshme dhe krejtësisht të pajustifikueshme. Ajo ka vënë inë pah se pavarësisht faktit se e drejta për të protestuar përbën një shtyllë kryesore të sistemit demokratik, kjo e drejtë në asnjë mënyrë nuk mund të shërbejë si mbulesë për akte vandalizmi apo agresiviteti. Duke u ndalur te sulmet ndaj efektivëve, zëvendëskryeministrja ka theksuar se asnjë lloj kauze, bindjeje apo përfitimi politik nuk mund të legjitimojë dhunën ndaj punonjësve të Policisë së Shtetit, të cilët janë të ngarkuar me detyrën parësore të ruajtjes së rendit dhe sigurisë publike. Ajo ka kërkuar nga të gjithë faktorët politikë, publikë, mediat dhe shoqëria civile që të mbajnë një qëndrim të qartë dhe të përgjegjshëm, duke u distancuar menjëherë nga aktet e dhunës në vend që t'i relativizojnë ato për përfitime të ngushta politike. Sipas Spahiut, mbrojtja e së drejtës për të protestuar është një detyrim demokratik, ndërsa dënimi i dhunës mbetet një përgjegjësi thelbësore qytetare, morale dhe shtetërore, pasi demokracia nuk mund të mbrohet kur sulmohen ata që garantojnë sigurinë e të gjithëve, duke përmbyllur mesazhin e saj me thirrjen e prerë: “Ndal dhunës ndaj Policisë së Shtetit!”