Berisha: Kupola e PS-së kundër çdo zgjidhjeje politike; ka vënë kriminelët pas studentëve dhe gjimnazistëve

Kryetari i Partisë Demokratike, Sali Berisha, ka bërë publike një deklaratë ku thekson se brenda radhëve të Partisë Socialiste janë shtuar zërat që kërkojnë një dalje politike nga situata aktuale e krijuar nga protestat. Megjithatë, sipas tij, drejtuesit kryesorë të kësaj force politike kundërshtojnë çdo mundësi dialogu apo dorëheqjeje të kryeministrit. Berisha u shpreh se figurat kryesore të kupolës qeverisëse, Belinda Balluku, Taulant Balla dhe Ulsi Manja, janë kundër çdo zgjidhjeje politike. Sipas kreut të opozitës, ata mblidhen çdo ditë në Vilën e Kuqe në periferi të Tiranës, ku së bashku me Oltion Bistrin – të cilit i është besuar roli koordinues i organizatave kriminale – po organizojnë elementë të krimit të organizuar dhe trafikantë kundër të rinjve që protestojnë. Partia Demokratike thekson se largimi i menjëhershëm i Edi Ramës mbetet kushti kryesor për të shmangur përshkallëzimin e mëtejshëm të krizës. Gjithashtu, opozita paralajmëron kupolën drejtuese të Partisë Socialiste se do të mbajë përgjegjësinë e plotë ligjore dhe morale për çdo situatë të tensionuar që mund të cënojë sigurinë e qytetarëve dhe protestuesve.