Skandali në protestë: Nëna e të riut të dhunuar nga policia zbulon se i biri u pagua për tubimin

Ngjarja e ndodhur gjatë protestës së së premtes në kryeqytet ka marrë një kthesë të papritur, pasi nëna e Muhamet Skanës – i riu pamjet e të cilit u bënë virale pas goditjes nga një efektiv policie – ka bërë një deklaratë tronditëse që hedh dritë mbi prapaskenat e pranisë së tij në shesh. E ftuar përmes një lidhjeje telefonike në emisionin “Aldo Morning Show”, ajo ka pohuar se i biri ishte angazhuar dhe paguar për të marrë pjesë në këtë tubim. Ajo ka sqaruar gjithashtu se i riu nuk ka statusin e studentit dhe se familja e tyre prej vitesh është e vendosur në Itali. Sipas dëshmisë së saj, Skana nuk ndjek ndonjë cikël studimesh as brenda vendit e as në shtetin fqinj, ndërsa pranoi se në fillim familjarët nuk kishin dijeni se pse ai ndodhej në mes të protestuesve. Nga njëra anë, ajo ka shprehur pakënaqësinë e saj lidhur me përdorimin e dhunës nga ana e efektivëve të rendit, ndërsa nga ana tjetër ka dënuar edhe veprimet e dhunshme të protestuesve, duke theksuar se nuk mbështet shkatërrimin e vendit. Në lidhje me gjendjen shëndetësore të djalit, ajo ka qenë e prerë duke mohuar lajmet e përhapura në rrjetet sociale se ai ishte dërguar në Spitalin e Traumës, duke siguruar se ai gëzon shëndet të plotë. Po ashtu, ajo ka hedhur poshtë çdo aludim apo pretendim se familja ka pasur takime me figura apo përfaqësues të politikës pas incidentit të shënuar. “Nuk është student aspak. Ka punuar në Itali”, u shpreh ajo, duke ruajtur një distancë dhe rezervë të theksuar sa i përket detajeve se si u përfshi në këtë protestë, duke përmendur se ka edhe aspekte private që nuk dëshiron t'i bëjë publike.