Bayerni shkatërron Leipzigun e Grudës, paraqitje fantastike dhe kreu i tabelës në Bundesliga

Bayern Munich ka konfirmuar dominimin absolut në Gjermani, duke i shkaktuar një humbje të rëndë dhe të thellë 6:1 skuadrës së Leipzigut, në sfidën e zhvilluar në “Allianz Arena”. Gjiganti bavarez ka kontrolluar çdo aspekt të ndeshjes, duke arritur një triumf të merituar dhe bindës para tifozëve të vet. Në këtë përballje të vështirë, futbollisti shqiptar Brajan Gruda e nisi ndeshjen nga minuta e parë si titullar për skuadrën e Leipzigut, por pavarësisht angazhimit të tij, ekipi vizitor nuk mundi t'i bënte ballë ritmit të lartë dhe fuqisë sulmuese të vendasve. Heroi i takimit për Bayernin ishte Luis Díaz, i cili dhuroi një paraqitje spektakolare duke realizuar tre gola në minutat 10, 47 dhe 69, për të siguruar kështu një het-trik personal. Pjesa tjetër e golave për vendasit u shënua nga Aleksandar Pavlloviq në minutën e 26-të, Michael Olise në të 34-tën, si dhe sulmuesi kryesor Harry Kane në minutën e 52-të. Ndërkaq, gjashtë minutat e fundit shtesë i shërbyen Leipzigut vetëm për të zbutur disfatën, me Maksimoviqin që gjeti rrjetën në minutën e 90+1. Falë kësaj fitoreje madhështore, Bayern Munich ngjitet në majën e renditjes tabelare me 14 pikë të grumbulluara, duke lënë prapa Borussia Dortmundin falë diferencës së golave. Në krahun tjetër, pas gjashtë xhirove të para të zhvilluara në kuadër të Bundesligës, Leipzigu mbetet i pozicionuar në vendin e shtatë me nëntë pikë në llogarinë e tij.