Valë pakënaqësish në rrjet: Postimi i Sara Hoxhës për protestën në Tiranë shkakton reagime të ashpra

Influencuesja e njohur Sara Hoxha është vënë në qendër të kritikave nga ndjekësit e saj, pasi zgjodhi që situatën e tensionuar të krijuar gjatë protestës në Tiranë ta komentonte përmes një postimi në rrjetet sociale, i cili u cilësua si i papërshtatshëm. Përmes një fotografie të ndarë në InstaStory, ajo näfaqet duke ushtruar palestër, e kthyer kokëposhtë dhe e mbështetur pas një muri, ndërkohë që sipër imazhit ka shprehur qëndrimin e saj rreth ngjarjeve në kryeqytet. "Po mundohem ta qartësoj mendjen, por gjithçka për të cilën mund të mendoj është… ishalla nuk lëndohet më njeri", ka shkruar ajo, duke e shoqëruar mesazhin e saj me një emoji të zemrës së thyer. Megjithatë, kjo mënyrë e përcjelljes së shqetësimit nuk është pritur mirë nga publiku. Në platformën X, imazhi i saj u shpërnda masivisht nga përdorues të ndryshëm, të cilët shprehën indinjatën e tyre për qasjen e zgjedhur nga influencuesja ndaj një ngjarjeje serioze. "Si mund të jetë një njeri kaq i shkëputur nga realiteti? Kaq i paditur? Më mirë mos fol fare sesa të nxjerrësh broçkulla nga goja", ka shkruar një prej përdoruesve të kësaj platforme. Debati ka vijuar me komente të tjera kritike, ku disa ndjekës kanë përdorur gjuhë të rëndë, duke e cilësuar pozicionin e saj gjatë ushtrimeve fizike si fyes në raport me seriozitetin e situatës së protestës.